Дар Фаронса барои бахшидани як шумораи маҷаллаи «Charlie Hebdo» ба мавзӯи пайғамбар Муҳаммад (с) редаксияро оташ заданд. Шаби чоршанбе, 2 ноябр, афроди номаълум редаксияи маҷаллаи «Charlie Hebdo»- ро, воқеъ дар Париж, оташ зад. Ин ҳодиса баъди нашри пешхабари (анонси) мавзӯъҳои шумораи навбатии ин маҷалла дар сомонаи интернетии редаксия, рӯй дод. Дар паҳлӯи пешхабар сурати издиҳоми мардум дар назди масҷид, акси китоби муқаддаси Қуръон ва матн бо забони англисӣ ба табъ расида буд, ки муаллифи он дар муроҷиат ба хонандагон даъво дошт офарандаи замину замон Оллоҳ аст. Инчунин зикр мегардид, ки сармоягузори сомонаи мазкур минбаъд Арабистони Саудӣ хоҳад буд. Дар пешхабар тазаккур дода мешуд, ки шумораи навбатии маҷалла ба музаффариятҳои «Баҳори араб» дар Либиё ва Тунис бахшида шуда, сармуҳаррири он пайғамбар Муҳаммад (с) мебошад. Гуфтанист, ки маҷаллаи «Charlie Hebdo» пештар низ мавзӯҳои исломиро ба хотири ҷалби таваҷҷӯҳ истифода намуда буд. Аз ҷумла соли 2007 пас аз нашри се карикатураи пайғамбар Муҳаммад (с) дар маҷалла, даъвои дар нисбати маҷалла пешниҳод шуда бе ҷавоб монда буд.

Тасмими пазируфта шудани Фаластин ба ҳайси узви комилҳуқуқи ниҳоди фарҳангии СММ-ЮНЕСКО, ба муноқишаи молӣ овард. Баъди эълони Иёлоти муттаҳидаи Амрико ва Исроил дар бораи минбаъд маблағгузорӣ накардани фаъолияти ин ташкилоти байналхалқӣ, инчунин кишвари Канада низ аз дунболи онҳо рафт. Ба гуфтаи Ҷон Берд вазири корҳои хориҷаи Канада, қарори ЮНЕСКО ҷавобгӯи манофеи раванди сулҳи Ховри миёна нест. Маблағи се кишваре, ки аз маблағгузорӣ даст кашид, дар ҳаҷми умум 28% буҷаи ЮНЕСКО (22% ИМА-80 млн. ҳама сола, ва 3%-и Исроил ва Канада) -ро дар бар мегирад. Гуфтанист, ки соли 1984 ИМА ЮНЕСКО-ро ба «сиёсати зидди амрикоӣ» айбдор карда, узвияти ин ташкилотро тарк карда буд, вале соли 2003 ҳамкориашро аз нав идома дод. Тавре Рудик Искужин, сардори ҳайъати Шӯрои федератсияи Парламенти Россия дар асамблеяи порлумонии Осиё ба «Известия» гуфтааст, буҷаи ЮНЕСКО-ро асосан кишварҳои арабӣ пур мекунанд. Вале ба гуфтаи Элеонора Митрофанова, раиси иҷроияи шӯро, сафири фавқулода ва мухтори Россия дар ЮНЕСКО, тасмими ИМА ниҳоӣ набуда, масъалаи пардохти ҳаққулузвият дар Конгресси ИМА баррасӣ хоҳад шуд. Тибқи Оинномаи ЮНЕСКО, кишваре ки ду сол паи ҳам ҳаққулузвиятро пардохт намекунад, ҳаққи овозро дар ин созмон аз даст медиҳад.

Имрӯз вакилони Маҷлиси намояндагони Маҷлиси Олии ҶТ дар иҷлосияи навбатӣ лоиҳаи Қонун «Дар бораи буҷаи давлатии ҶТ барои соли 2012»-ро қабул намуданд. Сафаралӣ Наҷмиддинов, вазири молияи Тоҷикистон, ки пешнависи Қонуни Буҷаи соли 2012-ро дар иҷлосияи порлумон муаррифӣ мекард, гуфт, ки чун дар солҳои қаблӣ ин буҷа иҷтимоӣ буда, қисмати аслии маблағи он барои тавсеаи бахшҳои омӯзишу парвариш, беҳдошт ва пуштибонии иҷтимоии ақшори фақири ҷомеаи кишвар ҷудо хоҳад шуд. Ҳаҷми умумии маблағи буҷаи соли оянда ҳудуди 10 миллиард сомонӣ ё 2,2 миллиард доллари ИМА буда, ин рақам аз буҷаи соли ҷорӣ 1,6 миллиард сомонӣ бештар аст. Ҳамчунин, дар ин санади молӣ дар соли оянда рушди маҳсулоти нохолиси миллӣ 7 дарсад ва мизони таваррум 10,5 дар сад пешбинӣ шудааст. Ҳарчанд дар Қонуни буҷаи соли 2012 баҳои 1 доллар дар баробари пули миллӣ 4,92 сомонӣ дар назар гирифта шудааст, аммо тибқи пешгӯйии Сандуқи Байналмилалии Пул мумкин аст, арзиши 1 доллар ба 5,30 сомонӣ баробар шавад.

-намоянлагон

-Ҳайати Кумитаи ҳуқуқи башар ва мададҳои башардӯстонаи Бундестаги Олмон таҳти роҳбарии бону Анжелика Граф ҷиҳати мулоқот бо вакилони Маҷлиси намояндагони Маҷлиси Олии Ҷумҳурии Тоҷикистон ва дигар намояндагони мақомоти марбутаи Тоҷикистон аз 1 то 5-уми ноябри соли равон дар кишвари Тоҷикистон қарор доранд. Ба иттилои сухангӯи Маҷлиси намояндагон – Муҳаммадато Султонов, мулоқоти ин ҳайати олмонӣ имрӯз, 2 – юми ноябр бо раисони кумитаҳои Маҷлиси намояндагон – Маҳмадалӣ Ватанов, Марҳабо Ҷабборова ва раиси комиссияи ин мақоми олии қонунгузор – Азизмат Имомов баргузор гардид. Ба гуфтаи манбаъ -дар ҷараёни мулоқот масъалаи тақвияти ҳамкориҳои кумита ва комиссияҳои Маҷлиси намояндагони Маҷлиси Олии Ҷумҳурии Тоҷики-стон бо кумита ва комиссияҳои Бундестаги Олмон мавриди баҳсу баррасӣ қарор гирифт.

Нимарӯзии 28 майи соли равон дар наздикии Маркази савдои «Садбарг» гурӯҳи шаҳрвандон ҷамъ шуда, баҳси ронандаи автомошинаи сабукрав ва кормандони БДА-ро бо ҳавас тамошо доштанд. Ба гуфтаи ронанди автомашинаи сабукрави тамғаи «Опел», ки худро Илҳом Асадуллоев муаррифӣ намуд, ӯ ва меҳмонҳое, ки аз Россия баргаштаанд, шаҳрро тамошо доштанд, ки кормандони БДА бо баҳонаи вайрон кардани қоидаи роҳ ӯро манъ кардаанд, ҳол он ки ӯ қоидаи роҳро вайрон накардааст.

Кормандони БДА баъди манъ кардани автомашинаи ӯ даъвои дигар пеш овардаанду аз мошини ӯ «трафарет» дарёфт карда, таҳдид намудаанд, ки «материали 510» тартиб медиҳанд. «Материали 510», дар ҳоли надоштани литзензияву иҷозатнома барои фаъолияти мусофиркашонӣ, тартиб дода шуда ҷаримаи минималии он аз 350 сомонӣ буда ва танҳо суд метаовнад онро муайян созад. Инчунин ба гуфтаи Илҳом Асадуллоев, кормандони ин соҳа бе пеш овардани сабаб, мошини ӯро кофту ков кардаанд: «Онҳо чӣ хақ доранд, ки мошини маро мекованд, диданда бинанду чизро аз мошин нагиранд»! Дар ҳамин ҳол, корманди БДА, ки дар он ҷо қарор дошту аз муаррифӣ намудани худ худдорӣ кард, гуфт, ки барои таксигӣ кардан литсензияву путевка лозим аст, ки инҳо надоранд. Вақте ки яке аз кормандони БДА пртокол тартиб медод, нафари дигар аз мошини ронанда тамғаи «шашка»-и таксӣ ва трафаретҳояшро бе иҷозаи ронанда мусодира мекард. Масъули БДА ин рафтори ҳамкорашро чунин шарҳ дод: – Мо бояд дар ҳузури шахсияти ронанда мошинашонро бинему трафаретҳояшонро гирем (ҳол он ки ронанда он вақт барои аз мошинаш мусодира кардани тамғаву трафарет қатъиян норозӣ буд), чунки онҳо ба гардан намегиранд, ман гуфтам андозу страховкаҳоятро биёр, инҳояшро низ надорад, ду – се нарушение дорад. Барои «шашка» истифода бурдан литсензия лозим аст, ки ӯ надорад.

-Кудратов

Ҳуқуқшинос Шуҳрат Қудратов мегӯяд, дар чунин ҳолат корманди БДА метавонад автомашинаро дида барояд. Вақте ки автомашинаҳои сабукрав трафарет доранду бо мақсади тиҷоратӣ фаъолият кунанд, аз рӯи қонун бояд дар ҳамон ҷо протокол тартиб дода шавад, ба шарте агар ронанда барои чунин намуди фаъолият литсензияву роҳхат надошта бошад, вале агар дар вақти манъ кардани мошин трафарет ва ё «шашка» дар боло, яъне дар ҷои ба мусофирони берун намоён набошаду дар ҷои дур аз чашми мусофирони берунбуда бошад, кормандони БДА ҳуқуқ надоранд, ки онро гиранд. – Барои гузаронидани кофтуков иҷозатномаи муфаттиш лозим аст. Ва танҳо дар ҳолатҳои фавқулодда гузаронидани кофтуков мумкин аст. Шуҳрат Кудратов мегӯяд, рафторе ки кормандони БДА кардаанд, ҳуқуқвайронкунӣ дар нисбати соҳиби мошин мебошад. Кормандони БДА бе иштироки соҳиби мошин, агар соҳибмошин дур аз мошин истода бошад, барои кофтукови мошин ҳуқуқ надоранд. Агар намояндагони БДА кофтукови мошинро зарур ҳисобанд, бояд бо иштироки шахсони холис кофтуков карда, протокол тартиб диҳанд.

Кӣ дар кӯчаи шаҳр ҳуқуқи ба навор гирифтанро дорад?

Ходисае ки байни корманди БДА ва ронанда ба миён омада буд, барои роҳгузарон аҷоиб менамуд, ки чӣ натиҷа медиҳад? Кормандони БДА Шаҳбоз Абдуллоев – як донишҷӯро, вақте ки ҳамин ҳодисаро ба телефони мобилиаш наворбардорӣ мекард, «ту ҳуқуқ надорӣ ба навор гирӣ» гуфта, хостанд ӯро ба шӯъбаи милиса баранд. Шаҳбоз Абдуллоев гуфт, ки навори гирифтаашро аз телефонаш нест мекунад, вале узри ӯ кормандони БДА-ро қонеъ накараду донишҷӯро ба таксӣ савор карда, ба милисахона бурданд. Вақте каме дертар мо бо ӯ дар тамос шудем, Шаҳбоз гуфт, ки «ҳамааш хуб аст, маро оварданд ба отделу номнавис карда, пайи дастамро гирифта, сар доданд». Шерафган Латифов – сардори маркази матбуоти РБДА Сарраёсати корҳои дохилии пойтахт, мегӯяд, аз сӯи шаҳрвандон ба навор гирифтани чунин ҳолатҳо манъ аст. Чун кормандони БДА низ кормандони ҳифзи ҳуқуқ ба ҳисоб рафта, амали онҳоро танҳо кормандони амнияти дохилӣ, амнияти миллӣ, агентии мубориза бо коррупсия ва журналистон метавонанд ба навор гиранд. Вале ҳуқуқшиносон бар онанд, ки «Чизе ки қонун манъ накардааст, мумкин аст». Шуҳрат Қудратов аз зумраи чунин ҳуқуқшиносон буда, мегӯяд, қонун дар ин бора чизи мушаххас нагуфтааст. Дар ҳолати болоӣ сабт намудани ҳодиса иҷоза аст, агар нафари сабткунанда каме дуртар аз ҷойи ҳодиса буда, барои адои вазифаи кормандони БДА халал ворид насозад.

Фархунда Ш.

Усома Бин Лодин дар васияти навиштааш аз фарзандонаш хоҳиш кардааст, ки ба гурӯҳи «Ал-Қоида », ки ӯ роҳбариашро ба зимма дошт, моил нашаванд. Тавре The Guardian хабар медиҳад, васияти «Терористи №1»-ро рӯзномаи кувайтии Al-Anbaa нашр намудааст. Ба ақидаи журналистон Бин Лодин васиятномаашро 14 декабри соли 2001, баъди амали террористии 11 сентябр, ки хадамоти махсуси ИМА барои дастгир намудани ӯ амалиёти ҷустуҷӯиро оғоз намуд, навиштааст. Инчунин Бин Лодин дар васиятномааш таъкид намудааст, ки мутаассифона, ба тарбияи фарзандонаш вақт ҷудо карда натавонистааст. Ӯ инчунин ба шавҳар баромадани занҳояшро низ қатъиян манъ кардааст. Бин Лодин дар васиятномааш рӯйхати террорҳои ба амал овардаи «Ал-Қоида»-ро, аз ҷумла терроре, ки соли 1983 дар Ливан бар зидди низомиёни ИМА амалӣ намудааст, куштори 19 нафар посдорони сулҳи СММ дар Сомолӣ соли 1993 ва таркиши сафоратхонаи ИМА дар Найробӣ соли 1998, овардааст. Редаксияи Al-Anbaa бо кадом роҳ ба дасти онҳо афтодани васиятномаи «Террористи рақами 1» ва аслӣ будани ин ҳуҷҷатро шарҳ надодааст.

Панҷгонаи номардумитарин вазирони Ҳукумати Тоҷикистон маълум гардид, ки ба ин рӯйхат Абдуҷаббор Раҳмонов, Гул Шералӣ, Шералӣ Хайруллоев, Абдураҳим Қаҳҳоров, Сафаралӣ Наҷмиддинов шомиланд.

Ҳангоми назар додан ба пурсиши Оҷонсии иттилоотии TojNews – «Кадоме аз ин вазирон номардумитаринанд?», ки 12 вазири Ҷумҳурии Тоҷикистонро дар назар дорад, бештари истифодабарандагон Абдуҷаббор Раҳмонов вазири маорифи кишварро интихоб кардаанд. Дар ин банд 243 нафар овоз додаанд, ки баробар ба 30 фоиз аст.

113 нафари дигар, баробар ба 14 фоиз ба Гул Шералӣ, 106 нафар баробар ба 13,2 фоиз ба Шералӣ Хайруллоев, 96 нафар баробар ба 11,9 фоиз ба Абдураҳим Қаҳҳоров, 95 нафар баробар ба 11,8 фоиз ба Сафаралӣ Наҷмиддинов овоз додаанд.

Бояд зикр намуд, ки пурсиши мазкур аз 26-уми апрели солӣ ҷорӣ пахш гардида, то имрӯз 807 нафар дар он иштирок кардаанд.

tojnews

«Террористи рақами 1», сардори «Ал-қоида» Усамо Бен Лоден як бӯстонсарои наздикии маркази Покистон – Исломобод кушта шудааст. Тавре хабаргузории NEWSru.com хабар додаст, Айни ҳол ҷасади Бенлоден дар дасти ҳукумати ИМА будааст. Дар ин бора се нафар намояндагони мақомоти ИМА, ки номашонро ифшро накардааст иттлоъ додаанд. Ҳамзамон, ин хабарро президенти Иёлоти Муттаҳидаи Амрико Барак Обама дар як изҳороти расмӣ тариқи телевизион тасдиқ кард. Ба изҳори президенти ИМА Барак Обама, сар аз моҳи сентябри соли 2001, пас аз ҳамлаҳои 11-уми сентябр хадамоти иктишофии ИМА дар пайи Усома бин Лодин буданд ва ин иттилоъро доштанд, ки пас аз оғози амалиёти ҷангӣ дар Афғонистон вай дар манотиқи марзии Покистон паноҳ бурдааст. Гуфта мешавад, ҳафтаи гузашта, замоне, ки дар бораи ҳаракат ва макони будубоши Усома бин Лодин иттилои кофӣ ба даст омада буд, Барак Обама ба баргузории амалиёти махсуси нерӯҳои ИМА барои боздошт ё қатли ӯ фармон додааст. Ин ҳамла шаби гузашта дар ҳудуди Покистон ба вуқӯъ пайвастааст ва дар ҷараёни даргирии мусаллаҳона бин Лодин кушта шудааст. Бино ба баъзе маълумотҳои дигар, бин Лодин бо ёрии тайёраи бесарнишини амрикоӣ ҳафтае пеш нобуд карда шудааст. Гуфта мешавад, дар ин кор ба амрикоиҳо қувваҳои амниятии Покистон кӯмак кардаанд. Президенти ИМА дар изҳороти худ мегӯяд, «ин ҷанге буд, ки на мардуми Амрико интихоб кардааст, балки Амрико ба ин ҷанг кашонида шуд ва ин ба ҳеҷ ваҷҳ ҷанг бо ислом набуд ва нест». Обама аз ҳамкории ҳукумати Покистон дар иҷрои ин амалиёт сипосгузорӣ кард ва гуфт, ки ҳарчанд солҳои зиёде дар ҷустуҷӯи Усома бин Лодин сарф шуд, дер бошад ҳам, ҳақ ба ҳақдор расид. Мақомоти қудратии ИМА Усома бин Лодинро такшилотчии асосии бузургтари ҳамлаи террористӣ дар ҷаҳон медонанд, ки 11-уми сентябри соли 2001 дар ИМА сурат гирифт. Он замон наздики 3 ҳазор кас кушта шуда буд.

«Дедовщина в таджикской армии» зери чунин сарлавҳа дар сомонаи интернетӣ smotri.com навори видиоие ба намоиш гузошта шудааст, ки дар он як сарбоз шояд рутба ва вазифааш боло бошад ё ба қавле «дембел» як гурӯҳи сарбозони дигарро, ки дар назди кати хобиашон рост истодаанд якояк зери мушту лағат гирфта , ҳатто як нафарро ба сар бардошта ба замин мепартояд ва ин сарбози ҷавон боз чолокона аз ҷо хеста дар саф қарор мегирад. Аз навор пай бурдан мумкин аст, ки сарбозони нав аз тарсу аз ночорӣ ба ин амали «денбел» эътироз намекунанд.

Акс аз сайти Д. Медведев

Президенти Россия Дмитрий Медведев дар сӯҳбати телевизионӣ гуфтааст, ки баъди ба итмом расидани мӯҳлати вазифаи президентиаш хоҳиши дарсгӯӣ дар мактаби байналмилалии инноватсионӣ «Сколково»-ро дорад. - Ман мехоҳам, ки зиндагии фаъол дошта бошам. Агар дар «Сколково» маъқул шавад, мехоҳам дар он ҷо омӯзгорӣ кунам, -зикр намуд Дмитрий Медведев. Медведев инчунин гуфтааст, ки ӯ ба ВАО низ шавқ дорад ва метавонист дар бахши иттилооти сиёсӣ шореҳӣ кунад. Вай илова намудааст, ки «баъди аз чунин вазифа рафтан худро дар дигар самт тасаввур кардан мушкил аст».