ТОҶИКИСТОН – КИШВАРИ САЙЁҲОН

Нашр шуд korbar - пн, 11/25/2019 - 11:45

Тоҷикистон бо кӯҳҳои осмонбӯс, меваҷоти пуршаҳду шакар, шаршараву рӯдҳо, марғзорони сабзу хуррам, олами рангоранги ҳайвоноту наботот, гиёҳҳои шифобахш, кӯшку қасрҳои қадима барои ривоҷу равнақи намудҳои гуногуни сайёҳӣ иқтидори бузург дорад.

Маҳз ба ҳамин хотир, Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соли 2018-ро Соли рушди сайёҳӣ ва ҳунарҳои мардумӣ эълон намуданд, ки самараи дилхоҳ ба бор овард. Аз ин рӯ, баҳри рушду пешрафти бештари соҳа, инчунин, инкишофи инфрасохтори деҳот Сарвари давлат зимни ироаи Паём ба Маҷлиси Олӣ пешниҳод карданд, ки солҳои 2019 – 2021 - Солҳои рушди деҳот, сайёҳӣ ва ҳунарҳои мардумӣ эълон шавад. Ва дар иртибот ба ин, иброз доштанд: «Мақсад аз ин пешниҳод амалигардонии талошҳои Ҳукумати мамлакат ба хотири боз ҳам обод кардани Тоҷикистон ва ҳалли масъалаҳои иҷтимоии аҳолӣ бо роҳи беҳтар намудани инфрасохтор, пеш аз ҳама дар соҳаҳои маорифу тандурустӣ, таъсиси ҷойҳои корӣ, таъмин кардани аҳолии деҳот бо оби босифати ошомиданӣ, бунёду таҷдиди роҳҳои маҳаллӣ, рушди инфрасохтори сайёҳӣ ва инкишофи ҳунарҳои мардумӣ, ба талаботи муосир мутобиқ сохтани сатҳи хизматрасонӣ ва баланд бардоштани некуаҳволии мардум дар ҳар як деҳа ва маҳали аҳолинишин мебошад».
Вобаста ба амалисозии ин ҳадафҳо имрӯзҳо дар гӯшаву канори гуногуни Ватани маҳбубамон корҳои ободонӣ вусъати тоза гирифтаанд. Садҳо иншооти зебову муосир ва корхонаҳои истеҳсолӣ бунёд мешаванд ва дар баробари ин, садҳо километр роҳҳои маҳаллӣ мавриди таҷдиду навсозӣ қарор гирифтаанд, ки рӯз ба рӯз симои кишварро ҳусни дигар мебахшанд. Натиҷаи ҳамин созандагиву бунёдкориҳост, ки ташрифи сайёҳон ба диёри офтобрӯ ва ҳамешасабзи мо беш аз пеш меафзояд. Агар соли 2018 ба Тоҷикистон зиёда аз як миллион сайёҳ омада бошад, тайи нуҳ моҳи соли равон шумораи онҳо, аллакай, бештар аз 900 ҳазорро ташкил дод.
Ин ҳанӯз оғози кор аст ва бо итминони комил метавон гуфт, ки дар амри боз ҳам ободу зебо гардондани Меҳани азизамон тамоми сокинони кишвар саҳми арзандаи хешро мегузоранд ва солҳои наздиктарин Тоҷикистон яке аз мамлакатҳои пешрафтаи сайёҳӣ шинохта хоҳад шуд. Зеро мақсад аз ин бунёдкориву созандагиҳо баланд бардоштани некуаҳволии мардум ва, дар маҷмӯъ, ба мамлакати мутараққӣ табдил ёфтани Ватани маҳбубамон мебошад.

Турон ТӮЙЧИЕВ, нависанда