ТОҶИКИСТОН. ҲИФЗИ ҲУҚУҚИ КӮДАКОН ДАР МАДДИ АВВАЛ

Нашр шуд korbar - пт, 11/29/2019 - 11:47

20 ноябр ба қабули Конвенсияи Созмони Милали Муттаҳид оид ба ҳуқуқи кӯдак 30 сол пур шуд. Ба ин муносибат, дар Китобхонаи миллии Тоҷикистон бо иштироки Азим Иброҳим, муовини Сарвазир ва, ҳамзамон, раиси Комиссия оид ба ҳуқуқи кӯдак дар назди Ҳукумати Ҷумҳурии Тоҷикистон, намояндагони вазоратҳо, кумитаҳои дахлдори ҷумҳурӣ, корпусҳои дипломатӣ, ҳамкорону шарикони рушд, ташкилотҳои ҷамъиятию кӯдакону наврасон, Саммити миллии кӯдакон доир гардид.
Созмони Милали Муттаҳид 20 ноябри соли 1989 санади муҳими байналмилалӣ- Конвенсия оид ба ҳуқуқи кӯдакро қабул намуд, ки аз ҷониби 196 давлат эътироф шуд.
Мақсади таҷлили ин рӯз ҷалб намудани диққати ҳамагон ба фаъолият оид ба таъмини шароити мусоид барои рушди ҳамаҷонибаи кӯдакон дар тамоми ҷаҳон мебошад. Конвенсия ҳуқуқи кӯдаконро ба таҳсил, сатҳи муносиби зиндагӣ таъмин намуда, онҳоро аз ҳама гуна шаклҳои зӯроварӣ ва табъиз ҳифз менамояд.
Ҷумҳурии Тоҷикистон баъди бадастовардани Истиқлолияти давлатӣ таҳти сиёсати инсондӯстонаи Сарвари давлат, Пешвои миллат муҳтарам Эмомалӣ Раҳмон ҳифзи ҳуқуқи кӯдакро муҳим шумурда, соли 1993 Конвенсия оид ба ҳуқуқи кӯдакро ба имзо расонд. Тоҷикистон дар он солҳо ҳодисаҳои мудҳишро аз сар гузаронд. Вале, қатъи назар аз ин, ҳуқуқи кӯдаконро дар мадди аввал гузошта, конвенсияро қабул намуд ва тӯли 26 сол дар ин самт ба пешравиҳои назаррас ноил гардид.
Ҳар 5 сол Ҳукумати Тоҷикистон оид ба уҳдадории худ вобаста ба конвенсия ба Комиссияи байналмилалӣ оид ба ҳуқуқи кӯдак ҳисобот пешниҳод месозад. Имсол Ҳукумати Ҷумҳурии Тоҷикистон ва Хазинаи кӯдакони СММ Барномаи ягонаи миллии кӯдаконро барои солҳои 2020 - 2030 пешниҳод намуданд. Ин барнома ҳамаи ҳадафҳои Ҳукумати Тоҷикистонро вобаста ба уҳдадориҳои давлатӣ ба кӯдакон дар чаҳорчӯбаи Ҳадафҳои Рушди Устувор дар бар гирифта, гувоҳи он аст, ки Тоҷикистон дар аҳди худ қавист.
Мутахассисон, ҳамчунин, ҷузъиёти молиявии татбиқшавии барномаро ба шарикони рушд, намояндагони давлатӣ ва ғайридавлатӣ пешниҳод намуданд. Таҳлили мутахассисон нишон медиҳад, ки Ҳукумати Тоҷикистон барои расидан ба ҳадафҳои худ дар чаҳорчӯбаи барнома хароҷоти 234 миллиард сомониро ба нақша гирифтааст. Ин хароҷот метавонад аз ҳисоби Буҷети давлатӣ, дастгирии шарикони рушд ва маблағгузории инноватсионӣ бошад.
Ёдовар мешавем, ки ҳифзи кӯдакон дар Ҷумҳурии Тоҷикистон аз Конститутсия сарчашма мегирад. Аз ҷумла, дар моддаи 34 - и қонуни асосӣ омадааст: “Модару кӯдак таҳти ҳимоя ва ғамхории махсуси давлатанд… Давлат барои ҳифзи кӯдакони ятим, маъюб ва таълиму тарбияи онҳо ғамхорӣ менамояд”.
Ш. ШАРИФОВ